Ari Haan, një vit në drejtimin e Përfaqësueses shqiptare

Trajneri Arie Haan ka mbushur 1 vit që nga dita kur mori
drejtimin e Përfaqësueses shqiptare. Teksa ka vizituar për herë të
fundit Shqipërinë për 2008-tën, tekniku holandez e ka cilësuar si të
suksesshëm vitin e parë të aventurës së tij në bankinën kuqezi.“Mund
të them se ishte një vit pozitiv. Pas vështirësive në fillim, mendoj se
tashmë skuadra është e konsoliduar. Nëse kërkoja të kisha në
dispozicion 25 futbollistë, tani mund t’i kem ata. Po ashtu, rezultate
e fundit mund të them se janë të suksesshëm dhe na bëjnë optimistë për
të ardhmen”, u shpreh Arie Haan, trajneri i Kombëtares shqiptare.

I pyetur se çfarë i uron vetes dhe skuadrës shqiptare për vitin 2009,
Han ka thënë se shpreson për të tjera rezultate pozitive. “Dua t’i uroj
skuadrës shqiptare sa më shumë rezultate pozitive në të ardhmen. E di
që nuk do të jetë aspak e lehtë, por ne duhet të vazhdojmë rrugën dhe
punën që kemi nisur. Për këtë jam optimist. Po ashtu dua t’i uroj
gjithë shqiptarëve sa më shumë të mira në vitin 2009”, vijoi ai.

Sfida e parë e Kombëtares shqiptare për vitin e ardhshëm do të luhet në muajin shkurt në Maltë.