Dhjetë sportistët më të mirë shqiptarë të vitit 2008

1. Romela Begaj (peshëngritje)
Ka lindur në Tiranë, më 2.11.1986. Rezultatet e larta të Romela
Begajt në këtë 4-vjeçar olimpik nisin që në vitin 2005. Por sigurisht
suksesi i saj më i madh, që e klasifikon në vendin e parë në top-listën
e sportistëve më të mirë, është ai i arritur në Lojërat Olimpike “Pekin
2008″, ku Romela Begaj renditet në vendin e 6-të në peshën 58 kg. Ky
rezultat është më i miri i arritur nga ekipi ynë në këtë olimpiadë. Por
ndër rezultatet më të mira të Begajt mund të përmendim titullin
nënkampione Europe për të reja në vitin 2005, medalje bronzi në
Kampionatin Botëror për të rinj në vitin 2006, medalje argjendi në
vitin 2007 në Kampionatin Europian për të rritur në Strasburg (Francë)
dhe në vitin 2008 medalje ari, argjendi dhe bronzi në Kampionatin
Europian për të rritur në Itali. Fiton për herë të parë në anketën “10
sportistët më të mirë”.

2. Arjan Beqaj (futboll)

Portieri Arjan Beqaj ka lindur më 20.08.1976 në Prizren. Prej më shumë
se dy vitesh ai luan për ekipin qipriot, Anorthosis Famagusta. Gjatë
këtij viti ai ka arritur shumë me këtë ekip, ku fillimisht fitoi
titullin kampion në Qipro, e më pas u paraqit denjësisht në grupet e
Ligës së Kampioneve. Beqaj, disa herë ka qenë heroi i Anorthosisit në
ndeshjet e këtij kompeticioni të rëndësishëm. Ai është pjesë e
padiskutueshme e ekipit kombëtar, ku ka disa vite që është titullar i
saj. Ky vit për të mund të cilësohet kulmi i karrierës. E fiton për
herë të…. këtë anketë.

3. Lorik Cana (futboll)
Ka lindur më 27.07.1983 në Prishtinë. 25 vjeçari vazhdon të
paraqitet me sukses në radhët e Olimpikut të Marsejës, ekip të cilit i
është bashkuar që në gusht të vitit 2005. Ai është prej dy sezonesh
kapiten i ekipit francez. Më shumë ka luajtur në pozicionin e
mesfushorit, por herë pas here, ashtu si në kombëtare, edhe te Marseja,
ka bërë më së miri qendërmbrojtësin. Pa diskutim është një nga talentet
më të mëdha të futbollit shqiptar dhe një nga më të rëndësishmit në
ekipin kombëtar, e natyrisht te Marseja. Lorik Cana e fiton për herë të
pestë anketën “10 sportistët më të mirë”.

4. Erkand Qerimaj (peshëngritje)
Ka lindur në Shkodër, më 10.08.1988. Rezultatet më të mira të këtij
sportisti në 4-vjeçarin olimpik janë titulli nënkampion Evrope për të
rinj për tri vite radhazi, 2005-2006-2007. Është pjesëmarrës në
Kampionatin Evropian për të Rritur të këtij viti, ku arriti rezultatin
më të lartë nga gjithë ekipi ynë i meshkujve, duke fituar dhe të
drejtën e përfaqësimit për herë të parë në Lojërat Olimpike “Pekin
2008″. Në këtë eveniment Qerimaj, mes një konkurrence tepër të fortë,
arriti të renditej në vendin e 13-të në peshën 77 kg. Por në karrierën
e tij Erkand Qerimaj mban disa rekorde evropiane për të rinj dhe një
titull nënkampion bote po për kategorinë e të rinjve. Erkand Qerimaj e
fiton për herë të katërt anketën “10 sportistët më të mirë”.

5. Klodian Duro (futboll)
Klodian Duro lindi më 21 dhjetor të vitit 1977 në Elbasan, ku dhe
nisi karrierën e tij si futbollist. Mesfushori i kombëtares është
shpallur disa herë kampion me Tiranën, ndërsa aktualisht po aktivizohet
me shumë sukses te ekipi qipriot, Omonia Nikosia. Duro, edhe pse luan
si mesfushor, në Qipro ka gjetur veten këtë sezon, duke shënuar disa
gola, madje në Kupën UEFA realizoi ndaj ekipeve të tilla, si Mançester
Siti dhe AEK. Përveç prezantimit të mirë që ka bërë me klubet ndër
vite, 31-vjeçari gjithnjë ka qenë një lojtar i rëndësishëm për
kombëtaren. E fiton anketën për herë të ……

6. Elis Guri (mundje)

Ka lindur në Shkodër, më 6.07.1983. Është sportist i mundjes klasike
(greko-romake) në peshën 96 kg. Suksesi i tij më i madh shënohet së
pari në Kampionatin Europian të këtij viti, që u zhvillua në Finlandë,
ku Elis Guri shpallet fitues i medaljes së bronzit në peshën 96 kg. Por
dhe në Kampionatin Botëror 2007 Elis Guri klasifikohet i 7-ti në peshën
96 kg, duke fituar të drejtën e përfaqësimit me kualifikim në Lojërat
Olimpike “Pekin 2008″. Si pjesëmarrës për herë të parë në një
olimpiadë, Guri renditet në vendin e 8-të, duke shënuar dhe rezultatin
e dytë më të mirë të arritur nga kuqezinjtë tanë. Të tjera rezultate të
Gurit mund të përmendin vendi i 7-të në Lojërat Mesdhetare “Almeria
2005″, medalje argjendi në turneu botëror Trofeu “Milone 2006″. E fiton
për herë të parë anketën “10 sportistët më të mirë”.

7. Vioresin Sinani (futboll)
Ka lindur më 4 nëntor të vitit 1977 në Shkodër. E nisi karrierën me
Vllazninë, ku dhe është shpallur kampion. Aktualisht, ai vazhdon të
luajë me ekipin shkodran dhe gjithnjë është dalluar si golashënues.
Këtë sezon, sulmuesi e ka ndihmuar ekipin e tij të zemrës, që është
shpallur kampion dimri. Në karrierën e tij, Sinani është thirrur edhe
disa herë me kombëtaren, por ndoshta shansi i keq apo vëmendja jo e
shumtë e trajnerëve ndaj tij, kanë bërë që të mos të aktivizohet. Ai ka
edhe dy eksperienca jashtë, me kroatët e Varteksit dhe turqit e
Kaisersporit. E fiton anketën për herë të…

8. Ervin Skela (futboll)

Ka lindur në Vlorë më 17.11.1976. Pas një eksperience të shkurtër në
Serinë A me Ascolin, fantazisti kuqezi kaloi te Energie Cottbus në
janar të vitit 2007. Që prej kësaj periudhe, 32 vjeçari është një lider
tek ekipi gjerman, teksa golat që ai shënoi në fundin e sezonit të
kaluar, rezultuan decizivë për qëndrimin në Bundesligë. Është pa dyshim
një nga lojtarët më të rëndësishëm te Cottbusi, por gjithashtu në
kombëtare. E ka treguar gjithnjë veten me lojën që ka zhvilluar, duke u
bërë gati i pazëvendësueshëm te kuqezinjtë. E fiton këtë anketë për
herë të …

9. Sahit Prizreni (mundje)

Ka lindur në Kukës, më 23.02.1983. Është sportist i mundjes së lirë në
peshën 62kg. Suksesi më i madh i këtij sportisti shënohet në shtator të
vitit 2007, ku në Kampionatin Botëror që u zhvillua në Azerbajxhan,
Sahit Prizreni renditet i treti në botë në peshën 62 kg, duke fituar
medaljen e bronzit. Ky është suksesi më i madh në historinë e mundjes
shqiptare. Me këtë rezultat Prizreni arrin të fitojë të drejtën e
përfaqësimit me kualifikim në Lojërat Olimpike “Pekin 2008″, ndërkohë
që në përfaqësimin e tij të parë në “Athinë 2004″ ai shkon me ftesë si
sportisti më i mirë shqiptar. I rikthehet ekipit kombëtar pas një
largimi 2-vjeçar drejt Amerikës, ku me ekipin e Nju-Jorkut arrin të
fitojë 3 herë medaljen e artë të Turneut Ndërkombëtar “Dave Schultz”. E
fiton për herë të parë anketën “10 sportistët më të mirë”.

10. Daniel Godelli (peshëngritje)

Ka lindur në Elbasan, më 10.01.1992. Ai është talenti më i ri i
peshëngritjes. Suksesin më të madh e ka shënuar këtë vit në Kampionatin
Evropian për të Rinj, që u zhvillua në Shqipëri në qytetin e Durrësit,
ku Godelli fiton 3 medalje ari. Por një sukses të tillë Daniel Godelli,
peshëngritësi nga Peqini, ka arritur ta regjistrojë edhe në Kampionatin
Evropian U 17, që u zhvillua po këtë vit në Amiens të Francës. Në këtë
kampionat, Godelli është shpallur Kampion i Evropës në stilin e
shkëputjes, duke arritur të ngrejë plot 118 kg. Më pas, talenti 17
vjeçar i shtangës ka arritur të fitojë edhe medaljen e arit në stilin i
shtytjes, duke ngritur plot 145 kg, e duke mahnitur të gjithë. Është
shpallur njëkohësisht edhe kampion i Evropës në dygarësh me 263 kg.
/Sporti Shqiptar/